الحلقــــــــــــــــــــ ( 8 )ــــــــــــة
.. الحب والزواج..
أغلب البنات إن مكنتش كلها بتدخل قصة حب على أمل جواز سعيد وناجح وحياة مستقرة
فحلقتنا النهاردة عن الحب والجواز
ألو أنا والقلوب ومنتداك
أختي أتجوزت زميلها فى الكلية بعد قصة حب دامت 4 سنين
أنا مشفتش اتنين حبوا بعض زيهم وبعد الجواز بسنة طلقها !!!!
أنا مش قادرة استوعب لحد دلوقتي ! وحسة إنى فقدت الثقة فى كل حاجة هو إيه الى بيحصل ؟؟
ألو أنا والقلوب ومنتداك
أنا مش عاوزة أتجوز جواز تقليدي أنا نفسي أتجوز عن حب
مش عاوزة جواز صالونات
مع إني حسه إن زواج تقليدى أو عن حب كله بقى فاشل ؟بس بقول لو عن حب يبقى أقلها هعيش أول أيام جوازى فى سعادة مش عارفة هو أنا بفكر صح ولا غلط
ألو أنا والقلوب ومنتداك
أنا في سؤال نفسي أسأله هو الحب مش كفاية عشان الجواز يبقى ناجح ؟ يعني بالعقل كده اتنين بيحبوا بعض أكيد هيحاولوا ينجحوا جوازهم ؟ ليه التجارب مش كده أنا هتجنن
الحب والزواج المفروض إنهم وجهين لعملة واحدة
حالياً بقوا في أذهان الناس حاجتين متناقضتين !
دلوقتي الجواز عند البنات بالأخص نوعين
إما جوازعن حب
أو جواز تقليدي أو صالونات
وبقى المنتشر عن الولاد بالأخص الجواز مقبرة الحب وإن قصص الحب بتموت بالجواز وفي النهاية كلهم بيبقوا زى بعض بعد الجواز ولو المأذون من الباب هرب الحب من الشباك
فيعيش حياته ويحب زي ماهو عاوز لكن وقت الجواز يتجوز من نوع تاني ينفع للجواز !
......المشكلة إن البنات مش عاوزة تصدق الحقيقة دي ...
يمكن اتكلمنا في حلقة حب تيك أواي عن ليه كثير من العلاقات مبتوصلش لمرحلة الجواز وليه كثير من الشباب بيتهرب للما يدخل الموضوع في الجد !
عشان هو من البداية دخل الموضوع للهروب من الضغوط فمعندوش إستعداد يتحمل مسئولية وتبقى وسيلة ضغط إضافية
لكن الملاحظ إن النسبة الي بيتم موضوعها وبتتجوز مبتعش الحياة السعيدة الرومانسية الي كانوا بيحلموا بيها !! وحالات كثير بتوصل للطلاق !!! أو تبقى حياة أقل من عادية
ليه ؟؟
فالكلام كثير فعاوزين نتكلم عن كل نقطة لوحدها
لكن لازم تبقي فاهمة حاجتين :
*علاقة الحب مش طريق الجواز
فلو مكتوب لك تتجوزيه هيكون بعلاقة قبل أو من غير ولو مش مكتوب لك القصة بتدوم سنين وبردو مبيتجوزوش ومش محتاجة أمثلة والواقع خير دليل .
بل فى تفكير منتشر عند كثير جدا من الشباب إنه بيحب البنت بمواصفات ولما يتجوز يتجوز بمواصفات تانية خالص !!
* علاقة الحب مش ضمان أبدا لجواز سعيد
بل أحيانا بيكون العكس هو الي صحيح وهنقول ليه
لو هنتكلم عن تقسيمة الجواز المشهورة التقسيمة نفسها غلط !
والتسمية بالصالونات والتقليدي من باب التنفير تحسسك كده
بما إنه ضد الجواز الي عن حب
يبقى أكيد ده جواز عن كره
مين قال كده ؟ الأفلام والقصص
ده على إعتبار إن الى متعرفش الى هتتجوزه قبل الجواز ويكون في بنهم علاقة هيبقى جوازها تعيس ومفهوش حب !
طب لو فكرنا بالعقل هو إيه الى بيحصل فى الحالتين ؟؟
فى الحالة الأولى : ميدخلش البيت إلا شخص متوفر فيه الشروط الأساسية الى البنت ممكن تقبل بيها
يعنى بتبقى عارفة المستوى الإجتماعى والتعليمى ووظيفته وسنه
وبيجي وتتم الرؤية
ولو حصل قبول شكلا وموضوعا من حيث أسلوب الكلم والتفكير وغيره والأهل اتفقوا ..
بتتم فترة تعارف أو خطوبة عشان يعرفوا بعض أكثر
وده ميمنعش إنه يحصل ميل قلبي بدون تجاوزات
وبعدها عقد ويكون فى متسع للمشاعر والحب
طب ده مش يحافظ على قلب البنت أكثر ؟؟
كام مشكلة حصلت لإنها اكتشفت إنها الشخص الى اتعلقت بيه مرتبط ! أو مستواه البيت هيرفضه
أو أفكاره طلعت مش ماشية معاها زى الى بتحب واحد على النت ولا من النظرة الأولى وبعدين تلاقيها مش مقتنعة عقليا لكن مشاعرها متعلقة بيه
أو حتى الى بتحب واحد سنين وتعرفه كويس وبعدين تحصل مشكلة ويسيبوا بعض لأى سبب أو حتى اتقدم لكن الأهل ميوافقوش أو حصل إختلاف فى الماديات وتنتهي القصة وقلب البنت معاها !
مش هنقول مفيش خطوبات بتتفسخ
لأ طبعا في ولكن الفكرة نسبة وتناسب
أكيد الوضع الأول أكثر حافظا على قلب البنت وكرامتها
ويكفي إن ده الى ربنا ارتضاه ليكى
وربنا الى خلقك لن يرضى لكى إلا بأفضل شىء
*
*
*
*
*
الغريب إن فى بنات بتتضايق وتقول إن بحس إنى سلعة !
غريب جدا التفكير ده !
مين الى سلعة الى معززة مكرمة فى بيتها ومتدخلش أى حد إلا بمواصفات فإن رضت به وافقت وإن لم ترضى رفضت
ولا الى بتقبل تتكلم وتخرج ويتقالها كلام حب و...... غيره
للأسف المشكلة إننا أتبرمجنا غلط وبنقتنع بكل الأراء إلا الدين
وهنلاقي ده عامل مشترك فى كل المشاكل !
فمن كثر ما الإعلام والأغاني والقصص اتكلمت عن الحب والجواز اتبرمجنا بمعلومات غلط
يعنى من المسلمات إن لازم تحصل قصة حب يا أما مع ابن الجيران يا أما مع زميلها فى الجامعة
حتى قصة الحب بقى مرسوم شكلها وطريقتها وكلماتها
والى مش حاسس بيها يحاول يعيش نفسه بالعافية و يعد النجوم ولو ملوش نفس ويقطع الورد مع إنه ملوش ذنب
اتبرمجنا أن دى السعادة وهى دى الطريقة الصح مع إن الواقع مختلف و نسبة فشل الزيجات الى مسبوقة بقصة حب كبيرة جدا
مش هنقول مفيش فشل فى الزيجات التانية لكن نسبة نجاحها أعلى بكثير ( ده في حالة لو تمت بمواصفات صحيحة)
لإنها مبنية على أسس كثير مش على شىء واحد
نرجع لسؤالنا : ليه نسبة فشل الجواز عن حب كبيرة ومش سعيدة زي ما أصحابها كانوا بيتمنوا ؟؟
وده طبيعي عقلاً وشرعاً
فجوازات كثير رغم إنها كانت مبنية على حب
فشلت وحصل طلاق أو أقلها بقت جوازة أبعد ما يكون عن تصوراتهم وملقوش السعادة الى كانوا متوقعينها
أولا - نتكلم بالعقل
1- قائم على أساس واحد ضعيف
تفتكري لو عندك مثلا طربيزة (مائدة )هل تسقيم برجل واحدة ؟
طيب ما بالك لو هتحطي عليها أوزان ثقيلة ؟ هتستقيم وتصمد ؟
طب أفرضي إن رجل الطربيزة مزينة بالنقوش والزخارف ومية الذهب حتى ده هيخليها تصمد ؟
الفكرة إن في بنات بتظن إنها ممكن تبني حياتها كلها
وجوازها ينجح لمجرد إن بتربطها مشاعر بالشخص الى هتتجوزه
المشاعر دي زي رجل الطربيزة في المثال بتاعنا متقدرتش لوحدها تتحمل أعباء الحياة فما بالكم إن كانت في الأصل رجل ضعيفة وهشة والمشاعر واهية
لإن الكل يجيد حب الكلمات والشهوات لإنه بلا ثمن ولا تضحيات ولكن مع أول إختبار يرسب وبشدة !
وبعدين دي حتى لو رجل من فولاذالطربيزة بردو مش هتكون متزنة برجل واحدة ! ولا تقدر تتحمل الأعباء ...
ومفيش أكثر من أعباء الحياة ...!
****************
2- قائم على صورة خيالية
فاكرين لما اتكلمناعن الصورة الى ف خيال كل شخص وأسطوريتها، المشكلة إن الاتنين تصورا تصورات خيالية ومبالغ فيها وفي معرفتهم ببعض قبل الجواز كل واحد كان بيحاول يطبق الصورة دى !
طبعا مع مراية الحب العامية الى مكنوش شايفين بيها أي عيوب
فكانت بترنلة مليون مرة فيرنها مليون وواحد
)
فتخيلوا إنهم لو اتجوزوا الحياة هتبقى وردي وكل طرف توقع من الطرف التاني حاجات مبالغ فيها فلما ملقهاش وبدأت تظهر العيوب وأكتشف الواقع بدأت المشاكل ! وفي كثير مبيقدرش يتحمل الصدمة دي فبيحصل الإنفصال
ثانيا بالشرع
مش أنتي مسلمة ؟يعني مؤمنة بالله وبرسوله وبتصدقيهم
مش كده ؟ مش معقول تصدقي كلام العقل ومتصدقيش كلام ربنا
طيب هنتكلم عن أسس في دينا ونطبقها على موضوعنا
1-كل ذنب له عقوبة ..العقوبة دي ممكن تكون إبتلاء دنيوي فربنا يكفر بيه الذنب أو عذاب في الأخرة عياذا بالله
أو تتوبي بصدق فربنا يغفر الذنب ويبدله حسنات أو ربنا يعفو
والصدق ده مش لعبة مش هتقولي طب خلاص أول يوم جواز أتوب عن الي فات بحيث متعاقبش والموضوع خلص
أنتى بتتعاملى مع ربنا الى يعلم ما في قلبك ويملك قلبك
علاقة البنت بشخص قبل الجواز عبارة عن سلسلة ذنوب
بداية من كلمات الحب والنظرات مروراً بالتجاوزات الأكبر
ونهاية بيوم الفرح وذنوبه .
إلى جانب نقطة شرك المحبة الى بتكون سبب في إن حبها يكون سبب عذابها زى ما اتكلمنا فى حلقة قبل كده
وكل الذنوب دي لا شك بتأثر على حياتهم الزوجية
{أَمْ حَسِبَ الَّذِينَ اجْتَرَحُوا السَّيِّئَاتِ أَنْ نَجْعَلَهُمْ كَالَّذِينَ آمَنُوا وَعَمِلُوا الصَّالِحَاتِ سَوَاءً مَحْيَاهُمْ وَمَمَاتُهُمْ سَاءَ مَا يَحْكُمُونَ} [الجاثية : 21]
***************
2- مين الى كان بيزين العلاقة قبل الجواز من غير زعل الشيطان
كان الممنوع مرغوب وليل نهار بيزين المعصية فى عنيهم
طب مين هيبقى أول أعداءهم بعد الجواز بردو الشيطان !
شوفي الحديث ده " إن إبليس يضع عرشه على الماء . ثم يبعث سراياه . فأدناهم منه منزلة أعظمهم فتنة . يجيء أحدهم فيقول : فعلت كذا وكذا . فيقول : ما صنعت شيئا . قال ثم يجيء أحدهم فيقول : ما تركته حتى فرقت بينه وبين امرأته . قال فيدنيه منه ويقول : نعم أنت"
صحيح مسلم
فهم قبلوا ولاية الشيطان قبل الزواج وإنه هو الى يتحكم فى تصرفاتهم فربنا تركهم له بعد الزواج ...
فكل واحدة بترتبط عشان الجواز
متعصيش ربنا !
رزقك كده كده هتاخديه
لكن اختاري أنتي عاوزة مين يكون وليك ؟
{وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ كَانَ مِنَ الْجِنِّ فَفَسَقَ عَنْ أَمْرِ رَبِّهِ أَفَتَتَّخِذُونَهُ وَذُرِّيَّتَهُ أَوْلِيَاءَ مِنْ دُونِي وَهُمْ لَكُمْ عَدُوٌّ بِئْسَ لِلظَّالِمِينَ بَدَلًا} [الكهف : 50]
موضوع ذو صلة
لماذا يفشل الزواج ؟؟ حالة طلاق كل 5 دقائق
إنتهت حلقتنا بفضل الله ..
فإنتظرونـــــــــا في الحلقة القادمة
و " فارس أحلامي "
موضوع: انا والقلوب ومنتداك 
الخميس يوليو 28, 2011 12:22 pm
